நகைச்சுவை நடிகர் வடிவேல் பாலாஜி காலமானார்.

விஜய் தொலைக்காட்சியில் கலக்கப்போவது யாரு, அது இது எது உள்ளிட்ட நிகழ்ச்சிகளின் மூலம் பிரபலமானவர் வடிவேல் பாலாஜி. கலக்கப்போவது யாரு நிகழ்ச்சியில் நடிகர் வடிவேலு போன்று நடித்ததால் ‘வடிவேல் பாலாஜி’ என புகழ் பெற்றவர்.

இந்நிலையில் வடிவேல் பாலாஜி (வயது 42) உடல்நலக்குறைவால் சென்னை ராஜீவ் காந்தி அரசு மருத்துவமனையில் அனுமதிக்கப்பட்டிருந்தார். அங்கு அவருக்கு மருத்துவர்கள் சிகிச்சை அளித்து வந்த நிலையில், சிகிச்சை பலனின்றி உயிரிழந்தார்.

மதுரையைச் சேர்ந்த வடிவேல் பாலாஜி, கோலமாவு கோகிலா படத்தில் நடித்துள்ளார் என்பது குறிப்பிடத்தக்கது.

கடந்த பத்து நாட்களுக்கு முன்பு நெஞ்சுவலி காரணமாக பிரபல தனியார் மருத்துவமனையில் சேர்க்கப்பட்டிருந்த வடிவேல் பாலாஜி, பொருளாதார பிரச்சனை காரணமாக அங்கிருந்து வேறு ஒரு சிறிய தனியார் மருத்துவமனைக்கு மாற்றப்பட்டார். இதன்பின், வீட்டுக்கு வந்த அவரின் உடல்நிலை மீண்டும் மோசமடைந்தது. இந்நிலையில், நேற்று நள்ளிரவில் அவருக்குத் திடீரென உடல்நலக்குறைவு ஏற்பட ஆம்புலன்ஸ் மூலம் ஓமந்தூரார் அரசு மருத்துவமனையில் அனுமதிக்கப்பட்டார். இதயத் துடிப்பு சீராக இல்லாததால், வென்டிலேட்டர் உதவியுடன் சிகிச்சை அளிக்கப்பட்டது. அவருக்கு கொரோனா பரிசோதனை செய்யப்பட்ட நிலையில்,  நெகட்டிவ் என ரிசல்ட் வந்தது. இந்நிலையில் இன்று வடிவேல் பாலாஜி (வயது 42) உயிரிழந்தார்.

மருத்துவமனையில் இருந்து அவரின் உடல் சேத்துப்பட்டில் உள்ள இல்லத்திற்கு கொண்டு வரப்பட்டது. அவருடைய ரசிகர்கள், பொதுமக்கள், நண்பர்கள் என அனைவரும் அவரது உடலுக்கு கண்ணீர் அஞ்சலி செலுத்தி வருகின்றனர். நாளை மதியம் 2 மணிக்கு சேத்துப்பட்டில் உள்ள மயானத்தில் அவரது உடல் அடக்கம் செய்யப்படும் என அறிவிக்கப்பட்டுள்ளது.